Ds. Peet Coetzee het op Petrusburg in die Vrystaat grootgeword en gematrikuleer. Na matriek het hy sy teologiese studies aan die P.U. vir C.H.O. voltooi. Tydens sy studentejare was hy aktief betrokke by die studentelewe, o.a. as primarius van Liberalia (Dawie Dup Noord, tans Exelsior) en die studenteraad. Hy was vele jare op die redaksie van die Jongeliede Vereniging se maandblad, Die Bondsbode, en ook redakteur.

Hy het in die volgende gemeentes gearbei : Reddersburg (4 jaar), Reitz (9 jaar), Suidkus (11 jaar) en is tans in Potchefstroom. Hy is op die Trustees van die Predikante Pensioenfonds en 'n kurator aan die Teologiese Skool Potchefstroom.

Hy is getroud met Heleen Swart en het twee dogters, Hita en Marlize. Heleen is tans wiskunde dosent aan die Noordwes Universiteit se fakulteit Opvoedingwetenskappe.

* ds. Peet ontvang in 2010 sy meestersgraad met lof aan die Universiteit van die Vrystaat onder die leiding van prof. Dolf Britz. Die meestersgraad handel oor die ontstaansgeskiedenis van die Gereformeerde Kerk Potchefstroom en paar ander gemeentes. Dit is baanbrekers werk en bevestig die ontstaan van die Gereformeerde Kerk Potchefstroom op nie later nie as 20 Maart 1859.